Израел минатата недела им претстави на САД список со своите услови за дипломатско решение за ставање крај на воениот конфликт во Либан, објави Ројтерс, повикувајќи се на информации од вчера на американскиот информативен сајт „Аксиос“.
Израел побара на неговите одбранбени сили (ИД) да им биде доделено овластување за „активно присуство“ за да се погрижи либанската шиитска група Хезболах да не ја вооружи и обнови својата воена инфраструктура во близина на границата со Израел.
Друг услов е израелските воздухопловни сили да имаат слобода да оперираат во либанскиот воздушен простор, продолжува Ројтерс, повикувајќи се на Аксиос.
Претставник на САД рече дека е малку веројатно Либан и меѓународната заедница да ги прифатат условите на Израел, објави Ројтерс, додавајќи дека Белата куќа се уште не дала официјален коментар. Истото важи и за американскиот Стејт департмент.
Специјалниот пратеник на Белата куќа, Амос Хохштајн – советник на американскиот претседател Џо Бајден, денеска е во посета на либанската престолнина Бејрут во потрага по дипломатско решение за конфликтот, додава Ројтерс.