Македонскиот тенисер Калин Ивановски триумфираше на годинашното издание на турнирот Macedonian Open во Скопје, откако во возбудливо финале го совлада Украинецот Владислав Орлов со 2-1 во сетови (6-1, 0-6, 6-2).
До титулата Ивановски стигна по два часа и 30 минути игра, освојувајќи го првиот трофеј по јули 2023 година и испраќајќи силна порака дека успешно се враќа по повредата што го оддалечи од терените кон крајот на 2023 година.
Македонскиот тенисер одлично го отвори мечот. По израмнетите почетни гемови (1-1), направи два брејка и со сигурна игра, крунисана со ас-сервис, го доби првиот сет со убедливи 6-1.
Во вториот сет следуваше целосен пресврт. Иако Ивановски имаше две брејк можности уште во воведниот гем, Орлов успеа да се извлече, а потоа целосно ја презеде контролата. Украинецот направи брејк за водство од 2-0 и не му дозволи на македонскиот тенисер да се врати во игра, освојувајќи го сетот со максимални 6-0.
Решавачкиот трет сет донесе голема борба. Клучниот момент се случи во вториот гем, кога Ивановски на свој сервис спаси три брејк-топки по маратонска размена од 20 поени и израмни на 1-1. Веднаш потоа направи брејк за водство од 2-1, а со уште еден одземен сервис во седмиот гем ја зголеми предноста на 5-2. Во последниот гем рутински го приведе мечот кон крај и заслужено стигна до победничкиот пехар.
За Ивановски ова беше 11-то финале во професионалната кариера и шеста освоена титула, воедно и прва по триумфот во австрискиот Крамзах во јули 2023 година.
Со триумфот на Macedonian Open, македонскиот тенисер освои 25 АТП поени и парична награда од 4.065 американски долари.
Ивановски продолжува со одличната серија резултати по враќањето на терените. Од почетокот на сезоната има 13 победи и само еден пораз, со две финалиња на турнирите од М25 серијата, како и четири победи во настапите за македонската Дејвис куп репрезентација.