Ковачевски: Кирил и јас сакаме ексел табели со рокови и остварување – „Имам голема надеж, очекувам реални резултати“, рече Петков

ПОСЛЕДНИ ВЕСТИ

Најважно за политиката е да се развива за доброто на двата народи. Нема ништо подобро од тоа да имаме отворена економија, поврзана инфраструктура, но внимателно да ги следиме и темите од историјата, човечките права и работите за европската интеграција, рече бугарскиот премиер Кирил Петков на стартот од заедничката владина седница меѓу Скопје и Софија.

„За мене има голема надеж, синоќа на заедничката вечера видовме дека некои од министрите наместо да ја завршат вечерата веќе дефинираме специфични мерки што треба да ги направат и затоа денеска очекувам како и со Димитар што разговаравме, реални резултати“, рече во воведното обраќање премиерот на Бугарија Кирил Петков.

Тој додаде дека овој дијалог ќе го замени национализмот, јазикот на омразата и ќе покаже дека на двете страни сакаат да направат што повеќе за добрососедство.

Премиерот на Македонија рече дека дводневната посета во Софија е успех бидејќи се реализира на само една недела по посетата на Скопје каде што имаше договор за теми кои значат подобра соработка на полета на образованието, инфраструктура, иновации и комуникација и подобри врски.

„Двете Влади ќе работат на теми кои се од областа на инфраструктурата, конкретно на Коридор 8, патна инфраструктура, железничка инфраструктура и во делот на телекомуникациското поврзување. Потоа во делот на образованието, со што ги поврзуваме и младите со што правиме размена на идеи, знаење и тоа дава поголем ефект, отколку тоа го правиме сами“, рече премиерот на Македонија Димитар Ковачевски.

Тој додаде дека тимовите ќе работат заедно со копретседавачи и во текот на наредните шест месеци тие заедно ќе управуваат со работните групи, кои нема да бидат составени само од политичари.

„Кирил и јас важиме за луѓе кои сакаме ексел табели, сакаат рокови, сакаат остварување. Ние ќе бидеме тука постојано и постојано ќе учествуваме во работата на се она што се прави и сакаме барем еднаш неделно работните групи сами да информираат за напредокот и со тоа да ги направиме граѓаните среќни“, додаде Ковачевски.

Од Софија за ТВ21, Јовица Пауноски