Мал авион се урнал во населбата Марфи Кенион во Сан Диего во раните утрински часови, соопштуваат локалните власти.
Несреќата предизвикала пожар во околу 15 домови, а жителите од неколку блокови биле принудени да се евакуираат.
На прес-конференција, заменик-шефот на Противпожарната служба, Дан Еди, изјави дека „има авионско гориво насекаде“ и дека главната цел на службите е да ги пребараат сите домови и да ги евакуираат луѓето на безбедно место.
Еди додаде дека „има директен удар врз повеќе домови“.
Засега не е познато дали има повредени или кој бил во авионот.
Федералната авијациска администрација соопшти дека станува збор за мал авион од типот Cessna 550, модел кој може да превезува од шест до осум лица.