Мехмедовиќ: Метапневмовирус е стар вирус, не треба да се очекува нов Ковид-19

Злате Мехмедовиќ, портпаролот на Комисијата за заразни болести коментираше за новиот вирус меапневмовирус, по појавата на случај во соседна Грција.

Мехмедовиќ вели дека вирусот е стар, и дека нема простор за паника.

„Вирусот е стар. Вообичаено циркулира во зимските месеци. Не треба да се очекува дека ова ќе биде новиот ковид-19 и не треба да се крева паника дека ова ќе биде нешто што повторно ќе се репризира – налик она што беше 2020 година кога се ширеше Сарс-ков-2“, вели Мехмедовиќ за МИА.

Тој посочува дека вакцина за овој вирус не постои и нагласува дека смртноста од него е исклучително ниска, многу пониска од таа на грипот.

Симптомите се како кај грипот – секреција, кашлање, кивање, телесна температура, болки во зглобови. Метапневмовирусот најчесто се пренесува преку близок контакт, преку допир на контаминирани предмети па потоа допирање уста, нос, очи. Вообичаено дава горнореспираторни симптоми, поретко долнореспираторни.

Мехмедовиќ е информира дека засега нема најава за заседавање на Комисијата за заразни болести.