Силните налети на ветерот ќе ги одбележат временските услови во земјава денеска и утре, поради што е издадено метеопредупредување. На одредени места се очекува ветерот да достигне, а локално и да надмине брзина од 60 километри на час.
Станува збор за ветер од северозападен правец, кој може да создаде проблеми, особено на отворени и незаштитени локации.
Поради најавените услови, се препорачува граѓаните да бидат внимателни при движење на отворено, особено во близина на дрвја, градилишта, рекламни паноа и други конструкции што би можеле да бидат оштетени или соборени од силните налети.
Дополнителна претпазливост се препорачува и за возачите, особено на отворени патни правци, мостови и делници каде што страничниот ветер може да влијае врз стабилноста на возилата.
Граѓаните треба да ги обезбедат предметите на балконите и терасите и да избегнуваат задржување под дрвја и нестабилни конструкции. Се препорачува и редовно следење на официјалните метеоролошки информации и предупредувања.