Енергетската криза во Европа се продлабочува, а цените на струјата и природниот гас достигнуваат исклучително високи нивоа. Сепак, Владата работи на нов модел со кој треба да се спречат големи поскапувања на електричната енергија и парното греење, порача премиерот Христијан Мицкоски во интервју за Сител.
Според Мицкоски, актуелната енергетска криза е една од најсериозните досега, пред сè поради нејзиното времетраење и континуираното зголемување на цените на енергенсите на европските пазари.
Тој посочи дека цената на електричната енергија на берзите веќе неколку месеци се движи над 300 евра за мегават-час, додека природниот гас, кој на почетокот на минатата грејна сезона чинел меѓу 28 и 32 евра, сега достигнува 85 до 86 евра за мегават-час, со повремени скокови и над 100 евра.
„Сето тоа како ресурс и суровина влегува во конечната цена на крајниот производ. Ние досега успешно ја менаџираме состојбата и креираме модели со кои сакаме да спречиме големи скокови на цените, какви што се случуваат во други европски земји“, изјави Мицкоски.
Премиерот очекува предложените мерки да овозможат стабилни цени на електричната енергија и греењето во текот на зимата, со што би се избегнал дополнителен притисок врз животниот стандард на граѓаните.
Според неговите проценки, доколку моделот се реализира успешно, инфлацијата би можела да се задржи во рамките на просечната годишна стапка од 3,5 до 4 проценти, наместо да се соочи со нов силен раст поради поскапувањето на енергенсите.
„Ќе треба да работиме ден за ден оваа зима. Целта е да обезбедиме доволно енергенси и да не дозволиме големи скокови во цената на струјата и парното“, нагласи Мицкоски.
Тој се осврна и на цените на горивата, истакнувајќи дека Владата ќе продолжи со политиките насочени кон одржување пониски цени и заштита на стандардот.
Според премиерот, дизел-горивото во Македонија чини помалку од 1,5 евро за литар, додека во дел од европските земји цените надминуваат две евра, а некаде достигнуваат и до 2,8 евра.
Мицкоски оцени и дека инфлацијата во Македонија во изминатите месеци била пониска од онаа во регионот и во Европа, нагласувајќи дека приоритет на Владата останува стабилноста на цените во услови на продолжена глобална неизвесност.
Според информациите објавени од Сител на 11 ноември, премиерот најавил и зголемување на домашното производство на електрична енергија преку РЕК „Битола“ и РЕК „Осломеј“, како и подготовка за рестартирање на ТЕЦ „Неготино“. Целта, според неговата изјава, е поскапувањето на струјата да се избегне или евентуалното зголемување да биде помало од пет проценти.