Најниски утрински температури се измерени на Попова Шапка со 4 степени, додека во Крушево и Лазарополе се спуштија до 6 степени. Во повеќе градови низ државата, како Крива Паланка, Берово и Маврови Анови, температурата изнесуваше 7 степени, додека во поголем дел од централните и источните региони се движеше меѓу 9 и 11 степени.
Во изминатите 24 часа најмногу дожд наврна во Битола, каде се измерени 11 литри на метар квадратен, по што следуваат Претор со 10 и Тополчани со 8 литри. Врнежи се регистрирани и во други делови од земјата, но со помал интензитет.
На Попова Шапка и натаму има снежна покривка, која изнесува 13 сантиметри, што е показател дека зимските услови сè уште се задржуваат на повисоките планински места.
Во текот на денот времето ќе биде променливо облачно со повремени локални врнежи од дожд. Ќе дува слаб до умерен ветер од југоисточен правец, а максималната температура ќе се движи во интервал од 15 до 21 степен.
Во главниот град ќе преовладува слично време – променливо облачно со повремен дожд и слаб до умерен југоисточен ветер. Максималната температура во Скопје ќе достигне околу 20 степени.