Министерот за правда, Јетон Шасивари, денеска присуствуваше на отворањето на „Нотарски денови 2026“ во организација на Нотарската комора, на дискусијата на тема „Расправање оставина: помеѓу законската рамка и нотарската практика“.
Во обраќањето, Шасивари го истакна значењето на нотаријатот како еден од столбовите на правниот систем и гарант на правната сигурност на граѓаните. Тој истакна дека работата на нотарите има директно влијание врз заштитата на сопственичките права, семејните односи и сигурноста на правните трансакции.
Шасивари рече дека довербата на граѓаните е најголемиот капитал на институциите, а вршењето на нотарската професија, покрај правната стручност, бара интегритет, независност, професионална етика и високо ниво на одговорност.
Министерот заправда информираше дека Министерството за правда, во рамки на претстојните реформи и процесот на европска интеграција, ќе посвети особено внимание на унапредувањето на законската регулатива во областа на нотаријатот, нејзиното усогласување со современите стандарди и дигитализацијата на постапките и услугите.
Според него, дигитализацијата треба да овозможи побрзи постапки, помалку административни пречки, пониски трошоци, поголема транспарентност и полесен пристап на граѓаните до правните услуги.
Во таа насока, Шасивари нагласи дека Нотарската комора ќе биде важен и рамноправен партнер на Министерството за правда, бидејќи одржливите реформи не се реализираат само преку законски измени, туку и преку тесна соработка со професионалците кои секојдневно ги применуваат законите во практика.
„Правната сигурност ја гради довербата, професионалноста ја штити, а одговорноста ја прави правдата опиплива за секој граѓанин“, истакна министерот Шасивари.