Општина Тетово вели дека ги казнува загадувачите – НВО бараат да се вклучат и институциите на централната власт

Со затворањето на фабриката „Југохром“ загадувањето во Тетово не е како порано, меѓутоа  граѓаните и натаму дишат загаден воздух. Според докторот од Центарот за јавно здравје – Тетово, Ратко Давидовски, има многу загадувачи, но како најголемите причини за загадувањето се начинот на греење, сообраќајот и градењето.

Од општина Тетово велат дека се преземаат мерки и дека изречени се 40 казни и 80 опомени за загадувачите.

„Некаде околу 40 казни за физички лица од околу 50 евра и за правни лица од 1000 до 1800 евра, а имаме некаде околу 80 опомени на лицата да не ја повторуваат оваа грешка“, вели Бесарта Рамадани.

Но, според невладините организации овие мерки не се доволни бидејќи, како што додаваат, во оваа борба треба да се вклучат и централните институции.

„Пред да дојдам овде, ја отворив веб-страницата на Општината за да видам дали сите изречени казни се објавени како што налага законот или проблемите кои се констатирани треба да ги има на веб-страницата на општина Тетово, за жал не беа, за да можеме да пренесеме дали ќе имаат епилог или не. Сепак има и други мерки, не се овие, прагот на аларм го поминавме во јануари и декември и нема податоци од Општината и повторно овие податоци не се на веб-страницата на општината, луѓето не се информирани дека има сериозен проблем и очекуваме не само локалните, туку и централните институции посериозно да го сфатат проблемот што го имаат граѓаните“, вели Елмедина Абдулау.

Инаку, извештајот на УНИЦЕФ за Македонија покажа дека смртните случаи на новороденчиња од загадениот воздух се 11,6%, односно 1 од 9 смртни случаи на деца под 1 година. Дури и Институтот за јавно здравје на почетокот на 2024 година објави извештај според кој речиси 18% од вкупната смртност во Македонија може да се препишат на изложеност на концентрација на ПМ 2,5 честички.