Потпретседателот на Демократската унија за интеграција, Бујар Османи, престојува во дводневна работна посета на Брисел, каде што остварува средби со високи претставници на европските институции и на Европскиот парламент.
Првиот ден вчера започна со средби со Емануел Жиофре, директор за Европа во Европската служба за надворешно дејствување (EEAS), и Валентина Суперти, директорка за Западен Балкан во DG NEAR при Европската комисија, како и со европратениците Лукас Мандл (AFET) и Илхан Ќучук, поранешен известувач за Северна Македонија.
Денеска, вториот ден, Османи продолжува со интензивна институционална агенда. Утрото започнало со средба со Андреја Вихер Вајт и Аделе Марсуло од кабинетот на еврокомесарката за проширување Марта Кос.
Потоа следуваат посебни средби во Европскиот парламент со европратениците Владимир Пребилич, Тајс Реутен и Матијаж Немец.
Во сите разговори доминирале две прашања: сериозната загриженост поради нарушувањето на Охридскиот договор како столб на соживотот и меѓуетничката стабилност.
Османи алармирал дека се спроведува подготвен и организиран план за поништување на мировниот договор, план кој веќе ги урнал неговите главни столбови, оставајќи вакум и сериозна непредвидливост што лесно може да биде злоупотребена од трети страни. Тој зборувал и за итната потреба од надминување на блокадата во процесот на европска интеграција, особено имајќи го предвид моментумот на проширувањето и напредокот што го постигнаа Црна Гора и Албанија.
Османи нагласил дека внатрешната и надворешната интеграција бараат храбри одлуки во државата, но и јасен и континуиран ангажман од европските партнери.