Министерката за одбрана Славјанка Петровска уверува дека дојавите за бомби не претставуваат реална закана за безбедноста на државата. Сепак вели таа институциите постапуваат и се преземаат сите потребни мерки за безбедност. Дополнително за ова е формиран оперативен тим од разузнавачките служби како и безбедносните институции кои заедно со партнерските служби треба да работат на откривање од каде доаѓаат заканите со бомби. Колку е ова предизвик и за НАТО?
„Предизвик се на секоја земја пред се на национално ниво, меѓутоа апсолутно се предизвик и на сите организации во кои што членуваме. Она што е заклучок и кој што беше споделен со јавноста од овој координативен состанок е дека во овој момент нема реална закана за безбедноста и тоа е она што треба да го знаат граѓаните, но апсолутно не оставаме ништо на случајност и службите секоја во својата надлежност ќе преземе дополнителни мерки за гарантирање на таа безбедност“, вели Славјанка Петровска.
За дојавите за бомби надлежните ги известиле и НАТО структурите а на вчерашниот координативен состанок се отворила дебата, Оперативниот тим под раководство на Бирото за јавна безбедност да ја забрза и подобри комуникацијата на службите како и на службите на партнерските земји. Со оглед на тоа што се работи за хибридна војна, колку се безбедни системите во државата?
„Сајбер заштита на сите институции и на државните, меѓутоа и пошироко на се она што претставува критична инфраструктура е сериозен предизвик. Имаме постојана комуникација и поддршка од стратешките партнери и во рамките на НАТО, меѓутоа и надвор од тоа заради тоа, знаете, како, сајбер заштитата е нешто на кое мора во континуитет да се работи и тоа не е нешто што еднаш засекогаш завршува. Сите евентуални обиди за сајбер напади ги следиме“, додава Славјанка Петровска.
Но, од ВМРО-ДПМНЕ критикуваат дека граѓаните се во постојана тензија и страв од нови дојави за бомби, а министерот за внатрешни работи Оливер Спасовски не презема доволно мерки за справување со оваа безбедносна закана. Воедно тие прашуваат и зошто не се побара помош и од партнерските земји.
„Останува нејасно зошто неспособниот Спасовски до сега не побарал помош од меѓународни и домашни експерти за решавање на овој проблем? Зошто дури сега после три месеци од континуирани закани и тензии се координираат безбедносните служби? Зошто не се искористени капацитетите на нашите пријателски и партнерски земји кога веќе власта тврди дека сме под хибридни закани?“, велат од ВМРО-ДПМНЕ.
Покрај во земјава, со најави за поставени бомби се соочуваат и земјите во регионов и тоа во Србија, Црна Гора, Босна, како и во Хрватска.