Француските власти подготвуваат засилени безбедносни мерки за протестите најавени за претстојниот викенд, откако претходните демонстрации беа проследени со насилство, немири и грабежи. Министерот за внатрешни работи Лоран Нуњез најави дека ќе бидат распоредени голем број полициски службеници за да се спречат нови инциденти.
Во изјава за радиодифузерот РТЛ, Нуњез посочи дека безбедносната операција ќе биде слична на онаа од минатиот викенд, кога низ Франција беа распоредени околу 70.000 полицајци, заедно со оклопни возила и водени топови.
„Ќе имаме распоредување со сличен обем“, изјави министерот, додавајќи дека засиленото полициско присуство ќе продолжи онолку долго колку што ќе биде потребно.
Тој истакна дека за време на претходните демонстрации биле ангажирани и специјализирани и елитни полициски единици, поради присуството на групи подготвени да прибегнат кон насилство.
Протестите во Франција започнаа со барања на младите за подобри услови и повеќе средства за училиштата, но подоцна им се приклучија и други групи граѓани кои негодуваат поради високите трошоци за живот.
Движењето „Жолти елеци“ повика на нови демонстрации во сабота, вклучително и собири и седечки протести пред Националното собрание и пред општинските згради низ земјата. Најавени се и протести во петок, кога демонстрантите планираат да удираат во тенџериња и тави, во рамки на таканаречената акција „касеролада“.
Францускиот претседател Емануел Макрон ги оцени планираните демонстрации како високоризични и повика протестните маршеви да се одржуваат надвор од градските центри.
Движењето „Жолти елеци“ ја одбележа француската политичка и општествена сцена од ноември 2018 до почетокот на 2019 година, кога илјадници граѓани протестираа против високите трошоци за живот и социјалната нееднаквост. Името го доби по жолтите флуоресцентни елеци што ги носеа демонстрантите.