Обилни дождови и поплави погодија делови од јужна Индија во текот на викендот, при што во државата Керала загинаа најмалку 11 лица, илјадници луѓе се раселени, додека во свлечиште во соседната држава Карнатака загинаа три лица, соопштија надлежните локални служби.
– До вчера речиси 7.700 луѓе се евакуирани во околу 275 прифатни центри ширум Керала – изјави премиерот на таа држава В. Д. Сатисан.
Тој потврди дека денеска ќе се сретне со официјалните претставници на округот за да ја разгледа организацијата на работата на прифатните центри.
Во подрачјата погодени од поплавите вчера почнаа акции за расчистување и спасување. Локалната служба за управување со вонредни ситуации соопшти дека денеска се очекува во одделни делови од државата да дува силен ветер и да паѓа умерен дожд.
Поради обилните врнежи затворени се многу училишта ширум државата, а владата ги одложи испитите на државно ниво.