Потврдена критичната состојба на мостот на Вардар кај Башино Село

По последните испитувања на мостот на Вардар кај Башино Село, стручњаците потврдија сериозни оштетувања на носечките елементи. Поради тоа, сообраќајот беше стопиран на 4 јануари. Проф. д-р Горан Марковски, декан на Градежниот факултет, истакна дека е потребна брза санација на оштетените столбови и носачи на мостот, а ќе се работи и на зајакнување на структурата.

Техничкото решение за санација веќе е доставено до ЈПДП, кој ќе избере изведувач по итна постапка. Првично, се предвидува мостот да се оспособи за сообраќај по една лента, а потоа ќе следи целосна санација. Долгорочен мониторинг ќе помогне во донесувањето на одлука дали мостот ќе биде еднонасочен или двонасочен.

Во меѓувреме, планирана е изградба на нов мост, 50 метри подолу, за кој се очекува почеток на работите средината на годинава. ЈПДП веќе е во процес на избор на проектант за новиот мост.