Повеќе од 130 луѓе се убиени во насилните судири меѓу шиитите и сунитите во северозападен Пакистан во изминатите десет дена, соопштија локалните власти.
Насилството избувна во областа Курам во провинцијата Хајбер Пахтунхва на 21 ноември, кога вооружени лица нападнаа од заседа конвој возила и убија 52 лица, главно шиитски муслимани.
Никој не ја презеде одговорноста за нападот, кој предизвика одмазднички напади во неколку области.
Само во изминатите 24 часа во судирите загинаа 14 лица, а 27 се повредени. Владините претставници повикаа на седумдневно примирје на 24 ноември, но тоа не беше испочитувано.
Шиитските муслимани се мнозинство во делови од областа, иако тие се малцинство во остатокот од земјата. Тие генерално живеат мирно заедно со сунитските муслимани, кои се мнозинство во Пакистан.
Но, десетици од двете страни се убиени во Курама од јули, кога спорот за земјиштето се претвори во крваво насилство.
Заменик-началникот на областа Курама рече дека се водат преговори со племенските старешини за нов прекин на огнот и дека е ангажиран безбедносен персонал за да се спроведе мирот.
Главниот автопат што го поврзува градот Парачинар со главниот град на провинцијата Пешавар останува затворен за секаков сообраќај, што доведува до недостиг на храна, гориво и лекови. Запрена е трговијата и движењето на границата со Авганистан.