Во текот на денешниот ден до граѓани пристигнуваат лажни SMS пораки во име на Управата за јавни приходи (УЈП), со известување дека „даночниот поврат е подготвен“ и со приложен линк, информираа од Управата.
„Доколку ја добиете оваа порака, НЕ ГО ОТВОРАЈТЕ ЛИНКОТ и не внесувајте лични, банкарски или други чувствителни податоци.
Станува збор за порака која може да биде обид за измама и злоупотреба на лични и финансиски податоци. Ги повикуваме граѓаните сите информации поврзани со УЈП да ги проверуваат исклучиво преку официјалните канали на Управата за јавни приходи, односно преку официјалната веб-страница www.ujp.gov.mk, официјалните е-услуги и официјално објавените контакт-адреси и телефонски броеви“, се вели во јавното соопштение на УЈП.
Од УЈП за информирање и контакт со институцијата ги посочуваат официјалната е-пошта: info@ujp.gov.mk, Инфо центар: 0800 33 000 (само од фиксни оператори) / 02 3253 200, како и официјалната веб-страница: www.ujp.gov.mk.
„Не кликајте на линкови од сомнителни SMS пораки и не споделувајте лични или банкарски податоци. Споделете го ова известување со вашите блиски за да се спречат можни злоупотреби“, порачуваат од УЈП.