Иранскиот претседател Масуд Пезешкијан денеска изјави дека Иран „не бара војна“, истовремено ветувајќи дека ќе следи „уште посилен одговор“ од Иран во случај на израелска одмазда за големиот ирански ракетен напад врз Израел извршен претходниот ден.
Доколку Израел „сака да реагира, ќе имаме посилен одговор“, рече Пезешкијан на заедничката прес-конференција во Доха со катарскиот емир Тамим бен Хамад ал Тани.
„Иран не бара војна, Израел не принуди да реагираме“, додаде иранскиот претседател.
Тој ова го изјави еден ден по иранскиот напад врз Израел со околу 200 ракети, од кои, според Техеран, 90 отсто ја достигнале целта.
Израелската армија, пак, соопшти дека нејзината противвоздушна одбрана пресретнала голем број од тие ракети, прецизирајќи денеска дека ракетите паднале врз воздухопловните бази во земјата, но не предизвикале никаква штета.
Директен ирански напад врз Израел, втор од април, вклучи сирени низ Израел, рани две лица во Израел и уби еден Палестинец на окупираниот Западен Брег, според спасувачите и палестински функционер.
„Злонамерната цел на ционистичкиот режим е да сее несигурност и да шири криза во регионот“, рече иранскиот претседател.
„Она што го бараме од САД и европските земји е да му кажат на субјектот што го засадиле во регионот (Израел) да престане да пролева крв“, додаде тој.
Емирот на Катар предупреди дека Израел со нападите врз Хезболах во Либан го доведува регионот „на работ на амбис“.
Катарскиот емир, исто така, ги осуди израелските напади во Појасот Газа и рече дека Доха ги продолжува напорите за посредување за постигнување примирје во војната што беше предизвикана пред речиси една година од нападот на палестинскиот Хамас на израелска територија.