Упадот во установата се случил околу 19 часот, по што чуварот веднаш го известил одговорното лице од техничката служба на поликлиниката и двајцата директори.
„Веднаш штом бев информиран за случајот, пријавив во Министерството за внатрешни работи и лично кај министерот Оливер Спасовски. Веднаш беше интервенирано и според моите информации, уапсени се две лица. Не знам што имале намера да градат, но вакво нешто е незамисливо, некој на диво да влезе во јавна установа и да почне да гради“, вели Виктор Исјановски.
Случајот бил пријавен синоќа, по 19 часот, а полицијата веднаш реагирала. По наредба на јавен обвинител одеземена е градежната машина, а кривичната пријава против двете лица веќе се процесуира и ќе оди по брза постапка. Министерот порача дека никој не смее да узурпира никакво земјиште и никаква сопственост, независно дали е приватна или државна.
Инаку, на само километри од поликлиниката никнува уште една дивоградба за која деновиве се пишуваше во медиумите. Истата подолго време се гради на државно земјиште кое е наменето за паркинг. Таму, иако градоначалникот на О. Центар два пати побарал асистенција од МВР за рушење на дивоградбата, таа не само што се уште стои, туку и го добива финалниот изглед. Според градоначалникот на Центар, Горан Герасимовски, акцијата за рушење била пробиена од Државниот инспекторат за градежништво и урбанизам.