САД извршија ограничен напад врз два ирански ракетни лансери на островот Ларак, во близина на Ормускиот теснец, тврдејќи дека Иран се подготвувал да постави поморски мини. Американската Централна команда акцијата ја опиша како „ограничена и прецизна“ и насочена кон „непосредна закана“ од Иранската револуционерна гарда.
Иран возврати со ракетни напади врз две американски бази во Јордан, тврдејќи дека тие биле користени за поддршка на американскиот напад. Иранската Револуционерна гарда соопшти и дека соборила американски дрон MQ-9 над Ормускиот теснец.
Од друга страна, јорданската армија соопшти дека пресретнала осум ракети кои влегле во нејзиниот воздушен простор.
Американскиот претседател Доналд Трамп објави дека иранскиот остров Харг е разнесен. Сепак, медиумските агенции не ја потврдија информацијата дека Харг бил нападнат, а објавеното видео најверојатно било генерирано со вештачка интелигенција.
Иранскиот претставник Хамид Бовар изјави: „Твитовите на Трамп се смешни а состојбата во Харг е мирна“, додека иранскиот претседател Масуд Пезешкијан порача дека никогаш нема да молчат пред која било агресија и ќе одговорат одлучно кон агресорите.
Во меѓувреме, САД најавија нови санкции против Иран и неговите економски партнери. „Ќе видите повеќе од ова секоја нередна недела“, изјави американскиот министер за финансии Скот Бесент.
Новата ескалација повторно го става Ормускиот теснец во фокусот, преку кој пред војната минуваше речиси една петтина од светската трговија на сурова нафта и течен природен гас.