Иранските напади со беспилотни летала врз објектите на ЦИА во Персискиот Залив ги поттикнаа американските разузнавачки агенции да истражат можност за руска вмешаност, или преку обезбедување информации за цели или преку напредна технологија, објавија двајца американски претставници, објавија странски медиуми.
Најмалку два објекта на ЦИА беа погодени во март. Едниот беше во комплексот на амбасадата на САД во Ријад, Саудиска Арабија, а вториот беше во источен Ирак. Неколку извори рекоа дека и други објекти на ЦИА биле цел на напади, но не дадоа детали.
Западните претставници во регионот на Персискиот Залив се сомневаат дека Русија му помогнала на Иран да ја подобри способноста на своите беспилотни летала „Шахед“ да погодуваат цели со екстремна прецизност. Американските аналитичари проценуваат дека два напредни беспилотни летала „Шахед“ биле користени во нападот врз американската амбасада во Ријад.
Точноста на таргетирањето на иранскиот „Шахед-136“ е подобрена благодарение на рускиот систем за сателитска навигација „Комета-М“, изјави друг извор. Кремљ ги негираше овие информации, нарекувајќи ги „лажни вести“, по сличен извештај на „Волстрит џурнал“ во март.
Даниел Хофман, поранешен шеф на станица на ЦИА, не мисли дека би било изненадувачки ако Москва му помогне на Техеран да ги нападне објектите на ЦИА, со оглед на стратешката соработка меѓу Русија и Иран.
„Тие се обидуваат да го намалат или елиминираат американското влијание во областите што ги означиле како нивни сфери на влијание“, рече тој.