Додека 19 годишникот се движел по улицата „Цветан Димов“, од возило „Пасат“ со кумановски регистарски ознаки, едно лице излегло и отворило оган. По пукањето се вратил во возилото и се упатил во непознат правец.
„Утврдено е дека повреденото лице е А.Б. (19) од Скопје, кој во службен разговор со полициските службеници појаснил дека додека се движел пеш по ул. „Цветан Димов“, од возило излегол Б.Б. и пукал кон него со пиштол неколку пати. Се преземаат мерки за целосно расчистување на случајот“, вели Гоце Андреевски.
Од опозициската СДСМ велат дека пукање има на секој чекор и бараат оставка од министерот за внатрешни работи Панче Тошковски.
„Ова е втор пат за 1 месец млад човек да биде жртва, во септември исто така од пукање беше повредено уште едно младо момче. Состојбата со безбедноста на улиците е алармантно влошена. Тоа е учинокот на Владата на Мицкоски во изминатите 100 дена. Со Тошковски и ВМРО-ДПМНЕ улиците станаа Див Запад, пукање има речиси секој ден, на секој чекор. Криминалните пресметки се во голем пораст, наместо ред и поредок се случува хаос“, вели Богданка Кузеска.
Одговори Тошковски:
„Разочаран сум од некрофилските обиди на СДСМ за манипулација на народот со обвинување за наводната неспособност на МВР во овие 100 дена и сметам дека истите се само очаен обид да го свртат вниманието од седумгодишниот хаос и уништувањето на безбедносниот систем што тие го оставија зад себе. Тврдењето дека за време на моето раководење со МВР е расчистен само еден случај е целосно лажно и манипулативно“, порача Панче Тошковски.
Од ВМРО-ДПМНЕ велат дека „престрелките на разулавените банди низ Скопје се директно масло на СДС со скопското подземје и завојуваните групи“.
„Престрелките на разулавените банди низ Скопје е директно масло на односите на СДС со скопското подземје и завојуваните групи чија моќ во време на СДС порасна а бизнисите цветаа. СДС од бандите во Скопје направи тајкуни плаќајќи долг за изборите од 2016та година кога истите тие бандити беа главни во штабовите на СДС низ Скопје“, вели ВМРО-ДПМНЕ.
Повреденото момче со повреди од огнено оружје, задржано е во ГОБ „Св. Наум Охридски“. Според официјалните бројки на МВР, во 2023 година имало 23 убиства од кои 2 нерасветлени, додека во 2024 година до месец октомври има 16 убиства, од кои исто така само 2 се нерасветлени.