Веќе една недела откако започна дебатата за свикување на пленарна седница, но сѐ уште нема никаква одлука од првиот човек на законодавниот дом, Талат Џафери околу тоа дали иницијативата е во ред и дали ќе со свика Собранието, за што иницијатор беше СДСМ. Од партијата не се откажуваат од иницијативата и велат дека веќе разговарале и со ДУИ.
Од ДУИ негираат дека меѓу нив и СДСМ имало комуникација по ова прашање. Портпаролот на партијата, Бујар Османи, вели дека „во моментов во нивната агенда има само едно прашање – како да се надмине пандемијата и животот на луѓето да се врати во нормала“.
Од Алијанса за Албанците пак, велат дека за ова прашање ќе се консултираат и со експерти.
-Ние ќе побараме мислење и од експерти да дадат конечно разјаснување за ова. Откако ќе го дадат разјаснувањето, подготвени сме да седнеме и да донесеме заедничка одлука за доброто на граѓаните-рече Таравари.
Но, свикувањето на седница поттикна и дебата околу прашањето – кога ќе се одржат предвремените парламентарни избори? Иако лидерска средба ќе има кон средината на мај, сепак од СДСМ сметаат дека е рано да се зборува за избори.
Од ВМРО-ДПМНЕ немаат јасен став околу тоа дали се за свикување на собраниска седница, и додаваат дека е непристојно да се зборува за избори во овој период.
Иницијативата за свикување на итна седница беше потпишана од 35 пратеници на СДСМ и коалицијата, исклучените пратеници од ВМРО-ДПМНЕ, Алтернатива, ДПА, Движењето Беса и на Алијанса за Албанците. Седницата има две цели: потврдување на одлуката за прогласување на вонредната состојба од Претседателот Стево Пендаровски на 18-ти март и на одлуката за продолжување на вонреднатата состојба на 16-ти април. Експертите со став дека нема ништо спорно во тоа Собранието да се свика и повторно да се распушти.