Седумкатна зграда во Истанбул делумно се урна во четвртокот, при што во објектот останале заробени најмалку седум лица, меѓу кои и шестгодишно дете, соопштија надлежните. Спасувачките екипи работат на извлекување на заробените.
Причината за уривањето засега не е позната, а истрагата е во тек.
Трите долни ката од зградата, вклучително и продавницата на приземјето, се урнале пред зори во истанбулската населба Малтепе, на азиската страна од градот.
Жителите од горните катови биле безбедно евакуирани, додека спасувачките екипи досега извлекле уште пет лица од урнатините и продолжуваат со напорите да стигнат до останатите седум лица, изјави гувернерот на Истанбул, Давут Ѓул.
Ѓул соопшти дека спасувачите стапиле во контакт со шестгодишното дете кое е заробено под урнатините, но засега не успеале да стигнат до него од местото каде што се наоѓа. Спасувачите сега се обидуваат да пристапат од друга страна.
Тој предупреди дека постои опасност од дополнително уривање на зградата.
Од безбедносни причини биле евакуирани и околните згради, додаде Ѓул.