Украинските воздухопловни сили вчера изгубиле контакт со борбен авион Ф-16 за време на борбена мисија, откако авионот доживеал вонредна состојба во лет, потврди војската.
„Пилотот е безбеден. Тој беше успешно евакуиран и транспортиран во медицинска установа за преглед и дијагностички тестови“, соопштија украинските воздухопловни сили. Според војската, пилотот учествувал во мисија за пресретнување на руски воздушни цели на еден дел од фронтовската линија кога, поради вонредна ситуација во лет, бил принуден да се катапултира.
Експерти и истражители работат на местото на несреќата, а властите објавија дека немало цивилни жртви или материјална штета на теренот.
Ф-16 се користи и во офанзивни и во одбранбени операции. Овие борбени авиони се распоредени за пресретнување на руски ракети и беспилотни летала за време на воздушните напади врз Украина, како и за лансирање ракети врз руски позиции долж фронтовската линија.
Украинските вооружени сили соопштија дека точната причина за вонредната состојба сè уште не е утврдена и дека е во тек истрага. Дополнителни детали за рутата на летот и делот од фронтовската линија каде што се случил инцидентот не се објавени.