Најмалку 20 лица загинаа во силниот земјотрес што го погоди северозападниот дел на Колумбија, јавува „Скај њуз“.
Земјотресот бил со магнитуда од 7,4 степени, а епицентарот се наоѓал на околу 34 километри северозападно од градот Картаго, на длабочина од 115 километри.
Најпогоден е департманот Чоко, каде што во главниот град Кибдо се регистрирани повеќе повредени и значителна материјална штета. Гувернерката Нубија Каролина Кордоба-Кури соопшти дека се урнале неколку објекти и дека надлежните екипи ја проценуваат состојбата.
„Загрижени сме поради можните афтершокови. Во Кибдо има повредени и значителна штета на зградите“, соопшти таа.
Според локалните медиуми, оштетени се катедрала и повеќе од десет аеродроми. Во Кали и Манизалес се уривале делови од фасади, додека на катедралата во Манизалес е оштетена една од кулите.
Дел од покривот на меѓународниот аеродром „Матекања“ исто така се урнал. Спасувачките екипи работат на терен и проверуваат дали има луѓе заробени под урнатините. Засега нема потврдени жртви или повредени од овој објект.
Силниот потрес бил почувствуван и во соседните Венецуела, Еквадор и Панама. Според надлежните, нема опасност од појава на цунами.