Под слоганот „Сите нека знаат“, денеска во главиот град на земјава ќе се одржи веќе традиционалниот Скопје Прајд 2026.
Најавувајќи го протестниот марш за човекови права, еднаквост и достоинствен живот на ЛГБТИК+ заедницата, организаторите велат дека слоганот „Сите нека знаат“ е одговор на тишината и замолчувањето со кое се соочуваат ЛГБТИК+ луѓето, но и порака дека тие се дел од секојдневниот живот, семејствата, пријателствата и работните средини во општеството.
Парадата ќе започне во 19 часот од Фонтаната во Градскиот парк во Скопје, додека собирањето на учесниците е закажано за еден час порано, во 18 часот. Маршот ќе се движи по булеварите Илинден, Партизански одреди и ВМРО, како и по улиците Рузвелтова и Димитрије Чуповски, а завршницата ќе биде во Жена парк – Борец, спроти Собранието.
Организаторите посочија дека промената и проширувањето на рутата има и симболично значење, со цел да се испрати порака дека јавниот простор им припаѓа на сите граѓани подеднакво.