Владата на Христијан Мицкоски од ВМРО ДПМНЕ има околу еден и пол месец да го убеди Уставниот суд само да го укине, а не да го поништи Законот за солидарен данок кој беше предложен од владата на Димитар Ковачевски од СДСМ.
Ова е епилогот по денешната седница на Судот на која мнозинството уставни судии изразија сомнеж во уставноста на овој Закон кој беше донесен во септември 2023 и со кој се оданочија 156 фирми кои платија дополнителен данок на државата од 49,2 милиони евра.
Сомнежот на судиите е првиот чекор од носење одлука дали Законот ќе се поништи, укине или ќе се запре постапката.
Ако Уставен реши да го поништи Законот, тоа ќе значи дека од буџетот на државава ќе мора да им се вратат парите на компаниите кои го платиле данокот, а тие и ќе можат да тужат за камати.
Ако се укине Законот, тоа ќе значи само дека во иднина Владата и Собранието нема да смеат да носат ист закон.
Постои и трета можност, тоа е запирање на постапката, но таа се користи во исклучително ретки случаи.
ПОНИШТУВАЊЕ – ПАРИТЕ СЕ ВРАЌААТ И МОЖНИ СЕ ТУЖБИ ПРОТИВ ДРЖАВАТА
УКИНУВАЊЕ – ЗАКОНОДАВЕЦОТ НЕМА ДА СМЕЕ ВО ИДНИНА ДА НОСИ ВАКОВ ЗАКОН
ЗАПИРАЊЕ НА ПОСТАПКА – СЕ ПРИМЕНУВА РЕТКО, ВО ИСКЛУЧИТЕЛНИ СЛУЧАИ
Иако првиот човек Уставниот суд, Дарко Костадиновски, на денешниот брифинг истакна дека вистинската моќ на судот за враќање на почитување на Уставот е примена на мерката поништување, појасни дека Владата во наредниов период, се до носење на конечната одлука некаде во јануари 2025, ќе има шанса да го убеди Судот дека има аргументи за укинување, а не за поништување.
Костадиновски наведе дека мнозинството уставни судии имале пет круцијални аргументи, меѓу кои е повреда на владеење на правото и тоа кога стапил на сила законот, за да ги прифатат аргументите на оние кои го оспорија законот, меѓу кои се Стопанската комора и Стопанската комора на северозападна Македонија.
ПРИЧИНИ ЗА СОМНЕЖ ЗА УСТАВНОСТА
- ПОВРЕДА НА ВЛАДЕЕЊЕ НА ПРАВОТО
- ЛОШО ТОЛКУВАЊЕ НА ЕУ ДИРЕКТИВА
- НЕСООДВЕТНО ПОВИКУВАЊЕ НА СОЛИДАРНОСТ
- РЕТРОАКТИВНОСТА Е ЗАБРАНЕТА
- ВАКАЦИО ЛЕГИС/РОКОТ НА СТАПУВАЊЕ НА СИЛА НА ЗАКОНОТ