Србија протера неколку лица од НВО – меѓу нив и македонската државјанка Искра Росо

Извршната директорка на Здружението за поддршка на лица со посебни потреби СОЛЕМ Искра Росо е македонската државјанка и претставничка на невладиниот сектор која била приведена и протерана од српската полиција и депортирана од Србија во Македонија.

Taa била спроведена од хотелот каде што престојувала во Белград без објаснување.

Росо ја потврди информацијата, за Македонската информативна агенција.

Инаку, ноќта помеѓу 21 и 22 јануари во Белград вкупно 13 странски државјани од Хрватска, Словенија, Словачка, Македонија, Албанија, Молдавија, Романија, Австрија и Чешка, биле приведени, а потоа и депортирани од Србија без објаснување.

Тие биле дел од Ерсте академија за невладини организации, во организација на Ерсте фондацијата.

Учесниците се приведени ноќта од хотелот во кој биле сместени во Белград без објаснување, а по неколкучасовно задржување морале веднаш да ја напуштат Србија.

Притоа тие добиле и забрана од една година за влез во земјата.