Европската Комисија реагираше денеска за протестите во Црна Гора поврзани за промените во законот за државјанство во оваа земја и потсети дека треба да се почитуваат основните ЕУ одредби.
Петер Стано, портпарол на Европската Комисија, изјави дека во однос на промените во законот за државјанство во ЕУ правилото е дека ова е строго национално прашање и дека секоја земја одлучува самостојно за критериумите, меѓутоа дека треба тие да се направат во рамките на законодавството на ЕУ. Тој нагласи и дека промените треба да се донесат на инклузивен начин.
-Секоја промена треба да биде направена на инклузивен начин со инволвираност на сите чинители и со широка консултација на темата, изјави Стано.
Портпаролот ги повика сите страни во Црна Гора да покажат воздржаност откако протестите се радикализираа. За Брисел е важно протестите да ги почитуваат правилата за јавно здравје, владеење на правото и јавен ред и мир.