Македонскиот пијанист Дино Имери приреди впечатлив музички настап во Германија, каде што заедно со оркестарот „Вурт Филхармоникер“, под диригентската палка на Клаудио Вандели, настапи на концертот „Традиција и модерна“. Настанот, одржан во „Кармен Вурт Форум“ во Кунзелсау, заврши со долготраен аплауз и стоечки овации од публиката.
Концертната вечер беше посветена на македонското музичко наследство и неговото поврзување со современиот симфониски израз, претставувајќи дела од домашни композитори пред германската публика.
На програмата се најдоа четири композиции од македонски автори: „Ситна Лиса“ во обработка на Дамир Имери, „Рана“ од Дијана Илкоска, „Тешкото“ од Глигор Смокварски и Концертот за пијано и оркестар од Дамир Имери. Посебен придонес во изведбата имаше и музичарот Ратко Даутовски, кој настапи на традиционалниот инструмент тапан.
Еден од најзначајните моменти на вечерта беше светската премиера на композицијата „Рана“ од Дијана Илкоска, која привлече особено внимание кај музичката критика. Германскиот критичар Андреас Дене од весникот „Хајлбронер Штиме“ ја истакна емотивната длабочина на делото и изведбата на оркестарот.
Позитивни критики добија и „Ситна Лиса“, поради спојот на македонскиот фолклор со симфонискиот звук, како и „Тешкото“, кое се истакна со својата динамика и впечатлив музички развој.
Централно место во првиот дел од концертот имаше Концертот за пијано и оркестар од Дамир Имери, во интерпретација на неговиот син Дино Имери. Неговиот настап, во придружба на оркестар со повеќе од 70 музичари, беше високо оценет поради техничката виртуозност, музичката зрелост и прецизната соработка со оркестарот.
Во вториот дел од вечерта беа изведени дела од францускиот композитор Морис Равел – оркестарската суита „Мојата мајка Гуска“ и Концертот за пијано и оркестар во Г-дур.
По силниот аплауз, Имери повторно се врати на сцената и изведе два биса – „Мак Олуја“ и „Ревиско Оро“ од Милан Завков, во пијано-аранжман на Дамир Имери.
Шеф-диригентот на „Вурт Филхармоникер“, Клаудио Вандели, упати пофалби за македонскиот пијанист, оценувајќи го како исклучителен уметник кој успешно ги обединува виртуозноста, зрелата интерпретација и изразената музикалност.
Со овој концерт, македонското музичко творештво доби значајна меѓународна промоција, а Дино Имери уште еднаш го претстави богатството на домашната музичка традиција на европската концертна сцена.