По неколкудневните реакции и дебати околу субвенционираниот студентски оброк, студентската организација „Студентски отпор“ соопшти дека е подготвена да го прифати решението што го предложиле Владата и Министерството за образование и наука. Сепак, конечната поддршка ќе зависи од исполнувањето на две конкретни барања.
Со предложените измени, студентите наместо досегашните 3.500 денари месечно би добивале по 4.500 денари, односно 1.000 денари повеќе за исхрана.
Новиот концепт предвидува воведување на системот „М студентски оброк“, преку кој средствата би можеле да се користат кај однапред определени трговци и маркети. Списокот со сите оператори треба да биде јавно достапен, а предвидените попусти да останат активни до последниот ден од месецот, дури и доколку студентот претходно го потрошил целиот износ.
Од „Студентски отпор“ велат дека по спроведените внатрешни консултации со студентите оцениле дека ваквото решение е прифатливо, но бараат јасни гаранции за неговото спроведување.
Нивниот прв услов е сите договорени поволности да бидат прецизно дефинирани во Законот за субвенциониран студентски оброк. Второто барање е списокот на компаниите каде што ќе важат новите правила, заедно со предвидените мерки, да биде објавен пред законските измени да почнат да се применуваат.
Со ова, организацијата дава условна поддршка за владиниот предлог, но останува на ставот дека ветените придобивки мора да бидат законски регулирани и однапред познати за студентите.