Нема недостиг од онколошка терапија, туку само една недела немаше биолошка терапија, рече министерот за здравство Арбен Таравари. Според него, неделава оваа терапија ќе биде повторно достапна.
-Има лекови за онколошките пациенти, недостигаше една недела само биолошка терапија. Сакам да ја информирам јавноста дека биолошката терапија е дадена многу порано, но барањата на пациентите се многу поголеми, затоа направивме и протоколи каде треба да се дава оваа биолошка терапија. Од оваа недела ќе ја има повторно биолошката терапија, изјави Арбен Таравари, министер за здравство.
Исто така и директорот на ФЗО, Сашо Клековски рече дека недостигот на биолошка терапија се комплетира.
Клековски зборуваше и за промените што планираат да ги направат за да најдат решение, како што се опремување на патолошки лаборатории надвор од Скопје, зголемување на капацитетот на ПЕТ скенерите и забрзување на процедурите. Во терапевтскиот дел рече дека ќе се зголеми базниот буџет за речиси 40-50 проценти што се очекува да биде одобрен оваа недела.
Ќе се размислува и за децентрализација на терапијата и дел од лековите во форма на таблети ќе бидат ставени на позитивната листа за да може да се примаат надвор од Онкологија.