Трамп веднаш ќе прогласи вонредна состојба

Новоизбраниот претседател на Соединетите Американски Држави, Доналд Трамп, веднаш по неговата инаугурација денеска ќе прогласи вонредна состојба во областа на енергетиката со цел да добие нови овластувања за да ги смени политиките на администрацијата на Бајден.

Со овие мерки Трамп сака да го поттикне развојот на производството на нафта и гас и во исто време да ги укине климатските регулативи од ерата на Бајден.

Овие мерки ќе влијаат на целиот спектар на енергетската индустрија во САД, од нафтените полиња до салоните за автомобили.

За време на кампањата, Трамп вети дека ќе воведе енергетска вонредна состојба, велејќи дека е потребна за да се зголеми производството на енергија и да се одговори на растечката побарувачка поради брзото усвојување на вештачката интелигенција.

Прогласувањето национална вонредна состојба му овозможува на претседателот да користи дури 150 специјални овластувања кои вообичаено се резервирани за ситуации како што се катастрофи како урагани, терористички напади и други непредвидени настани.