Цените на нафтата достигнаа највисоко ниво во последните четири години во вторник, откако политичката веб-страница „Аксиос“ објави дека американската војска ќе го информира претседателот Доналд Трамп за евентуални мерки против Иран, зголемувајќи ги стравувањата од нова ескалација на конфликтот на Блискиот Исток.
Цената на суровата нафта од типот Брент за испорака во јуни на Лондонската берза утрово се зголеми за 6,84 проценти на 126,10 долари за барел, пред да падне на околу 123,7 долари, што е сепак за 4,8 проценти повеќе во однос на претходниот ден. Во меѓувреме, американската лесна сурова нафта надмина 110 долари.
Цените на нафтата вчера повторно нагло пораснаа, за повеќе од шест проценти. Цената на суровата нафта од типот Брент сега е на највисоко ниво од почетокот на 2022 година.
Порталот „Аксиос“, повикувајќи се на два извори запознаени со ситуацијата, објави дека Централната команда на САД се подготвува да му презентира на Доналд Трамп планови за можна воена акција против Иран.
Според претходните извештаи, Доналд Трамп го отфрли предлогот на Техеран за повторно отворање на Ормутскиот теснец, сигнализирајќи дека поморската блокада ќе остане на сила сè додека не се постигне поширок договор за нуклеарната програма на Иран.
Сообраќајот на танкери низ Ормутскиот теснец, низ кој минува околу една петтина од светската нафта и течен природен гас, продолжува да биде сериозно нарушен. Неодамнешните случувања дополнително ги зголемија загриженостите во врска со снабдувањето со енергија.
Голдман Сакс проценува дека извозот преку овој клучен пат паднал на само четири проценти од вообичаеното ниво, во време кога преговорите меѓу САД и Иран се во застој, додека блокадата на САД дополнително ги оптоварува залихите.