„Цитроенот“ се појавил пред зградата на Вања три дена пред да биде киднапирана

Денеска продолжи судењето за грабнувањето и убиството на Вања Ѓорчевска, случај во кој првоосмничен е Љупчо Палевски – Палчо.

Обвинителството денеска презентираше материјални докази, и снимка од системот „Сејф сити“ на кој се гледа „Цитроенот“ на Панче Жежеовски како од Маџари преку Автокоманда се упатува кон улицата Наум Наумовски Борче пред зградата во која живее Вања на 24 ноември.

Тоа било во 6:38 часот и се гледа како возилото се движи на булеварот Александар Македонски кај Авткоманда, а во 6:44 бил забележан пред Влада, и на семафорот врти лево, па десно пред бензинската пумпа „Макпетрол“. На следната снимка се гледа како возилата доаѓа од кај Општина Центар и хотел „Сити Парк“ и доаѓа пред зградата на Вања во 6:49 часот.

„Ова покажува дека возилото три дена претходно се движело по истата рута како и на критичниот ден“, рече Обвинителката Жанета Трајковски.

На сите овие снимки не се гледа кој го вози автомобилот, но се гледаат три лица.

Потоа беше прикажано движењето на цитроенот на денот кога била грабната и убиена 14-годишната Вања.

„На 27 ноември во 6:28 минути, возилото е видено на улиците низ Чаир. Го продолжува движењето во насока кон Центар, а потоа продолжува да се движи по булеварот Христијан Тодоровски Карпош. На раскрсницата кај Владата, возилото е во 6:33 часот, и потоа продолжува кон булецарот Климент Охридски, па се упатува конј улица Орце Николов. Во 6:36 минути е снимен на паркингот кај хотел Парк. Тука подзастанува и продолжува да се движи право кон зградата на оштетената Вања Ѓорчевска на улица Наум Наумовски Борче, каде што стигнува во 6 часот и 37 минути, презентираше обвинителката.