Во изминатите 24 часа на територијата на земјава се регистрирани вкупно 33 пожари на отворен простор, од кои четири се активни, четири се ставени под контрола, а 25 се целосно изгаснати, информираше утрово Центарот за управување со кризи (ЦУК).
Активни пожари има во општините Студеничани и Зелениково, во близина на селата Моране, Вртекече и Габер, со крак кон селата Палиград и Вразжал во Општина Зелениково.
Пожар е активен и во Општина Македонски Брод, во близина на местото Видуш и селата Драгов Дол и Локвица.
Во Општина Кичево активен пожар има во близина на селото Тајмиште и местото Дарда, додека во Општина Гостивар пожарот е регистриран во близина на селото Горна Ѓоновица.
Под контрола се ставени пожарите кај селото Илинден, во близина на селото Бигла кај Делчево, кај селото Туденце во Општина Јегуновце, како и во Општина Врапчиште, во близина на селата Ломница и Ѓерѓевиште.
Надлежните служби продолжуваат со следење на состојбата и интервенирање таму каде што е потребно.