Бројот на жртви во несреќата со туристички брод во виетнамскиот залив Халонг се искачи на најмалку 38, а неколку лица сè уште се водат како исчезнати, соопшти владата. Спасувачите продолжуваат да бараат преживеани.
„Најмалку 38 лица од бродот се потврдени како мртви, додека 10 се спасени“, се вели во соопштението на владата. Официјалната новинска агенција Виетнам објави дека сите 48 патници биле виетнамски државјани, вклучувајќи неколку деца.
Десетици спасувачи, вклучувајќи членови на граничната стража, морнарицата, полицијата и професионални нуркачи, се распоредени на местото на настанот. Иако морето сега е помирно, временските услови продолжуваат да го попречуваат пребарувањето поради слабата видливост.
Во времето на несреќата имаше силни ветрови, обилни дождови и грмотевици.
Владата потврди дека потонатиот брод е извлечен од морето. Несреќата се случила вчера околу 14 часот по локално време, кратко откако тајфунот Вифа влезе во Јужното Кинеско Море.
Властите соопштија дека во времето на несреќата во областа имало силни ветрови, обилни дождови и грмотевици, но нагласија дека условите не се директен резултат на приближувањето на тајфунот, туку резултат на атмосферската нестабилност над северниот дел од земјата.
Во февруари 2011 година, туристички брод се преврте во истиот залив, при што загинаа 12 лица, вклучувајќи странски туристи. Се очекува тајфунот Вифа, трет што го погоди Јужното Кинеско Море оваа година, да го погоди северниот брег на Виетнам на почетокот од следната недела.