Турција повторно го засилува лобирањето во САД за враќање во програмата за авиони F-35, потпишувајќи договор вреден 2,4 милиони долари со влијателна лобистичка фирма во Вашингтон блиска до американскиот претседател Доналд Трамп.
Турското Министерство за национална одбрана потпишало едногодишен договор вреден 2,4 милиони долари со компанијата Ballard Partners, според документите доставени до американското Министерство за правда. Договорот, потпишан на 8 август, предвидува плаќање од 200.000 долари месечно за услуги поврзани со односите со американската влада, стратешко советување и застапување на интересите на Анкара пред федералните институции.
Компанијата, исто така, ќе има задача да ја информира турската влада за случувањата во американскиот Конгрес и за политиката на САД, во обид да се создадат неопходните услови за враќање на Турција во програмата F-35. Ballard Partners ја предводи Брајан Балард, познат републиканец од Флорида и поддржувач на Трамп, кој работел и на кампањите на американскиот претседател.
Компанијата има историја на соработка со Анкара. Во 2017 година, за време на првиот мандат на Трамп, Турција ја ангажирала Ballard Partners со договор вреден 1,5 милиони долари. Фирмата значително ја зголемила својата активност во Вашингтон. Само во првиот квартал од 2026 година, нејзините приходи од федерално лобирање надминале 30 милиони долари.
Меѓу лицата кои работеле со компанијата се и Сузан Вајлс, актуелната шефица на кабинетот на Белата куќа, како и Пем Бонди, поранешната американска јавна обвинителка.
Тимот кој се занимава со прашањето за Турција го вклучува и поранешниот демократски конгресмен Роберт Векслер и Томас Бандри, кој служел како специјален помошник на Трамп и како висок директор за законодавни прашања во Советот за национална безбедност.
Анкара беше исклучена од американската програма F-35 во 2019 година, откако Турција го купи рускиот систем за противвоздушна одбрана С-400. Вашингтон оцени дека користењето на рускиот систем претставува ризик за безбедноста на напредната технологија на американските авиони.
И покрај исклучувањето, Турција продолжи да бара враќање во програмата. Анкара, исто така, тврди дека шест авиони F-35 изработени за Турција сè уште се чуваат во САД.
За да се отвори патот кон враќање во програмата, се разгледувале различни сценарија, вклучително и можноста Турција да се откаже од системите С-400 или да ги префрли во трета земја.
Новиот договор со Ballard Partners покажува дека Анкара се обидува да ги искористи и лобистичките канали во Вашингтон за да ги убеди Конгресот и американската администрација да ѝ овозможат враќање во програмата F-35.