Турција предложи изградба на воен нафтовод вреден 1,2 милијарди евра со цел да помогне во задоволување на енергетските потреби на сојузниците на НАТО во Источна Европа, објави „Блумберг“.
По иницијативата на Алијансата за проширување на нејзината мрежа на воени нафтоводи, Анкара предлага новиот нафтовод да ја поврзе Турција со Романија преку Бугарија, изјавиле извори кои сакале да останат анонимни. Предлогот на Турција доаѓа во период кога земјата се подготвува да биде домаќин на самитот на НАТО во јули.
Според истите извори, нафтоводот од Турција до Романија би чинел само една петтина од другите алтернативни планови кои веќе биле предложени, вклучително и рутите преку Грција или преку западните соседи на Романија. Тие додале дека таквите рути би биле поранливи, бидејќи зависат од поморски транспорт.
Целосната руска инвазија врз Украина и конфликтите на Блискиот Исток, вклучително и неодамнешните прекини во снабдувањето со енергија поради затворањето на Ормускиот теснец, ја поттикнале НАТО алијансата да го зајакне својот систем за снабдување со гориво, изјавиле изворите.
Тие ја нагласиле важноста од стабилен и отпорен синџир на снабдување со прифатливи трошоци за источните членки на Алијансата.