Турција ќе започне прекугранична офанзива против курдските милитанти ЈПГ во североисточна Сирија, доколку групата не ги прифати барањата на Анкара, изјави денеска турскиот министер за надворешни работи Хакан Фидан, додавајќи дека новото сириско раководство исто така мора да биде вклучено во ова прашање.
Анкара ја смета ЈПГ за терористичка група и ја поврзува организацијата со деценискиот бунт на курдските милитанти против турската држава. ЈПГ е еден од водачите на Сириските демократски сили (СДФ), поширока група сојузничка на САД во борбата против Исламската држава. Турција веќе неколку пати воено интервенираше против ЈПГ.
Во интервју за Си-Ен-Ен, Турчинот Фидан, исто така, рече дека претседателот Таип Ердоган и наредил на турската армија да го преземе управувањето со затворите и камповите во североисточна Сирија, каде што се притворени припадници на Исламската држава, кои моментално се под контрола на СДФ, доколку новото сириско раководство не го постигне тоа.