Учениците од скопската населба Визбегово кои учат во училиштата во општина Чаир, од понеделник нема да имаат превоз, најави првиот човек на Чаир, Висар Ганиу.
Ова, како што рече е резултат на долгот што го имаат кон ЈСП кој настанал поради економската криза.
„Над 6 милиони денари плаќаме за една година за школување на овие ученици, односно за нивниот превоз. За оваа ситуација известени се навреме сите надлежни државни институции и побаравме зголемување на блок-дотациите, но досега не добивме одговор. Пред една година потпишавме договор кој го објавивме во сите медиуми и првпат заеднички ги поделивме трошоците за учениците, но општина Бутел не се придржуваше на договорот“, истакна Висар Ганиу.
Првиот човек на Бутел, Дарко Костовски, вели дека и општината со која раководи тој плаќа превоз за учениците од Чаир кои следат настава во Бутел.
Костовски додава дека договорот со ЈСП предвидувал плаќање на рати и верува дека за неколку месеци средствата ќе бидат исплатени.