Учениците од Визбегово без училиште и превоз – Смилевски: Каде живеат?, Жителите: Знае, беше пред изборите!

Наместо да бидат на час, неколку ученици од Визбегово и вториот училиштен ден го поминаа играјќи на улица. Некои бидејќи немаат технички уреди за следење онлајн настава, а некои пак, бидејќи немаат со што да стигнат до училиштето „7 Март“, каде треба да следат настава со физичко присуство.

„Четврто одделение сум. Сакам да одам на училиште. Немаме ниту компјутери, ниту телефони… не отвора ништо бидејќи немаме добар интернет, затоа сакам да одам на училиште“, вели ученик во четврто одделение.

Ученик: Наставата ја следам онлајн.
-Дали вчера почна?
Ученик: Не, сѐ уште не.
-Денеска?
Ученик: Не, ниту денеска.
-Дали дојде наставничката да ви ги донесе материјалите дома или учевте од телевизија?
Ученик: Не, не ништо не правевме.

Само овие деца ја следеа наставата, бидејќи родителите ги однеле на училиште со сопствени возила.

-Кое одделение сте?
Ученичка: Второ.
-Дали денеска бевте на училиште?
Ученичка: Да.
-Со што отидовте?
Ученичка: Со автомобил.

Овие ученици наставниот процес го следат или во училиштето „26 Јули“ во Шуто Оризари или во училиштето „7 Март“, бидејќи и по 15-годишните ветувања, сѐ уште немаат училиште. Мештаните револтирани. Велат дека децата дека не учеле ниту за време на пандемијата.

„Не знаеме дали некогаш ќе се направи нешто добро за Визбегово. Има 1.200 куќи. Учениците за да стигнат од Момин Поток до Шутка или до „Адем Јашари“, треба да патуваат 5км. Учениците од „Адем Јашари“, повеќето од зимата не одат на училиште. Мраз, ладно, автобусот не доаѓа бидејќи е расипан. Не знам како може оваа држава да постои кога не се грижи за домаќинствата?! Кога станува збор за гласови сите трчаат“, вели жител

„Се потрудија да направат нешто, но видовме дека беше само политички маркетинг“, посочи жител.

Став побаравме и од градоначалникот на Бутел, Велимир Смилевски – зошто овие ученици немаат превоз? Тој вели дека не е запознаен со проблемот и праша дали жителите живеат на територијата на општината со која раководи тој, или пак во Шуто Оризари?

Жителите со контра-одговор до Смилевски – градоначалникот многу добро знае каде живееме!

„Ние со адреса сме во општина Бутел. Градоначалникот знае каде е излезот. Градоначалникот е запознаен со проблемот со училиштето“, додава жител.

Од училиштето „7 Март“ известија дека превоз нема обезбедено за околу 20 ученици од прво до трето одделение кои наставата мора да ја следат со физичко присуство. Уверуваат дека и официјално ќе го информираат Смилевски за овој проблем.

Училиштето во Визбегово, пак, ќе го чека ребалансот на Буџетот. Само патот кој води до училиштето е асфалтиран, а темелите на училиштето ќе бидат ставени следната година во февруари, вети пред неколку дена Смилевски, во емисијата „10 Минути“ на ТВ21.