ВИДЕО: Мицкоски го прашува Николоски кои се следни проекти во инфраструктурата, потенцирајќи дека „годините изгубени во корупција и без визија се зад нас“

Премиерот Христијан Мицкоски, заедно со министерот за транспорт Александар Николоски преку видео објавено на друштвените мрежи рекоа дека експресниот пат Чатач-Длабочица-Крива Паланка го зајакнува местото на Македонија на Балканот како важен транспортен коридор.

Мицкоски додаде дека проектот е дел од ветувањето на Владата за подобрување на животниот стандард и враќање на државата во рацете на граѓаните. „Ветивме и исполнуваме! Македонија со секој ден станува сѐ повеќе ваша“, порача тој.

Новата инфраструктура, според премиерот, е симбол на посветеноста на Владата кон граѓаните и важен чекор кон развојот на земјата. „Нема подобар начин да ви ги честитаме празниците освен со она што најдобро знаеме да го правиме – работа и резултати“, додаде Мицкоски.

Во објавеното видео Мицкоски уште вели дека годините загубени во корупција и без визија се минато.

Мицкоски: Александар, кои се следните планови во инфраструктурата?

Николоски: Веќе е готов експресниот пат Градско-Прилеп. Се работи интензивно на автопатот Кичево-Охрид. Како и на автопатот Гостивар-Кичево. Се работи на автопатот Прилеп-Битола, а веќе е готова и првата фаза од пругата кон Бугарија и многу други проекти. Се работи на браната „Отиња“, во јужниот дел се интензивира работата на патот Богданци-Понов мост. Се работи со засилена динамика низ цела Македонија и на многу други проекти.