Владејачката коалиција во Турција до парламентот поднесе предлог-закон, чија цел е постигнување мир со Курдистанската работничка партија (ПКК), меѓу другото преку заштита на многу поранешни припадници од кривично гонење и суспендирање на затворските казни за голем дел од оние осудени за членство во организацијата.
Законот, кој се очекува да биде усвоен во парламентот подоцна оваа недела, има за цел да стави крај на повеќедеценискиот конфликт, делумно преку олеснување на враќањето во Турција на потенцијално илјадници поранешни припадници на ПКК кои се наоѓаат во северен Ирак.
Според предлог-законот, турската Национална разузнавачка организација (МИТ) ќе го потврдува разоружувањето на групата, додека посебен комитет – составен од потпретседателот на државата, неколку министри и директорот на МИТ – ќе го надгледува предавањето и разоружувањето на поранешните борци.
Предлог-законот претставува значаен чекор кон ставање крај на бунтот што од 1984 година досега однесе повеќе од 40.000 животи, предизвика длабоки поделби во Турција и поттикна насилство преку границите, во Ирак и Сирија.