Во Хрватска бојкот на продавници – Економисти: Добро освестен потрошувач може да влијае на цените

Ова не се скопските маркети. Ова е сликата на денешна Хрватска каде што граѓаните ги бојкотираа продавниците поради високите цени, пред се на секојдневните производи. Граѓаните со поддршка на акцијата, која се реализираше по повикот на граѓанската организација „Европски потрошувачки центар на извонредност“.

„Денеска не бев во дуќан и нема да одам воопшто. Препорачувам тоа да потрае подолго. Повеќе денови да трае. Да им докажеме дека не сме толку глупави без разлика која цена да ја ставаат дека ние ќе купуваме. Значи нема“, вели граѓанин.

„Ако треба, јас сум рекол и недела дена. Или ако не се може месец дена, може една продавница да се бојкотира месец дена, другиот месец ти си на ред. Тоа би требало да се направи“, додава друг граѓанин.

„Не знам колку ќе биде ефективен еднодневниот бојкот, не знам, тоа би требало да ескалира секако, али во секој случај го поддржувам, секако дека го поддржувам“, граѓанка.

Бојкотот е со огромни, лоши бројки за трговците. За половина во однос на минатиот петок е намален прометот во хрватските продавници. Акцијата на огромниот број незадоволни Хрвати ja поддржаа и политичари како од хрватската власт, така и од опозицијата.

А, трговците пак со провиден ПР само за денеска дадоа големи попусти на дел од производите.

Инаку, според македонските економисти, бојкот на одредени производи или продавници е една од реалните мерки кои може да влијае на висината на цените. Со тоа се намалува побарувачката, која заедно со либерализацијата на понудата и зголемување на производството се пазарни мерки се подобри од административните како замрзнување на цените или маржите. За Македонија, важно е граѓаните и да знаат како да го користат Законот за нефер трговски практики кој треба да даде добри резултати.

„Во делот на страната на побарувачката потребно е да се делува на свеста на купувачите за од една страна да ги пријавуваат ваквите нефер трговски практики, а од друга страна на некој начин да ги блокираат или да не купуваат од таквите трговски ланци кои што имаат нефер трговски практики“, изјави Благица Петрески, Фајнанс тинк.

Инфлацијата во Македонија лани во однос на 2023 беше 3,5 насто повисока, кај храната и безалкохолните пијалаци за 2,9, но ако се види декември 2024 во однос на истиот месец 2023 храната беше поскапа за дури за 5,6 насто иако половина месец имаше таканаречена новогодишна кошница. Владата најавува, рамазанска и велигденска кошница.