Десетгодишното работење на една агенција може да се раскаже преку бројки, проекти и награди, но и преку луѓето што биле дел од нејзиниот развој. Токму тие две страни беа споени на одбележувањето на 10-годишнината на Why Agency, кое се одржа на 3 септември во Музејот на современата уметност во Скопје.
На едно место се собраа актуелни и поранешни членови на тимот, клиенти, партнери, соработници и пријатели на агенцијата. Заедничко за нив се различните приказни и периоди во кои биле поврзани со Why Agency – од првите години, па сè до денес.
Во просторот беа изложени фотографии, предмети, проекти и моменти кои го одбележале работењето на агенцијата од 2016 година наваму. Дел од нив потсетуваа на почетоците, а дел на промените низ кои поминале тимот и начинот на работа.
Јубилејот беше искористен и за претставување на новиот идентитет на Why Agency. Промената, како што беше објаснето, не се однесува само на визуелниот изглед, туку на начинот на кој агенцијата денес ги поставува и решава проблемите за своите клиенти.
Во изминатите десет години, Why Agency работела со повеќе од 200 клиенти на над 13 пазари, а меѓу досегашните признанија се издвојуваат и две бронзени награди од A’ Design Awards.
Во фокусот на новата визија останува прашањето „why?“, односно потребата најпрво да се утврди што треба да се реши, а потоа да се избере соодветниот пристап, идеја и реализација.
Основачот на агенцијата, Рилинд Хоџа, посочи дека во текот на десетте години значително се променил начинот на размислување и пристапот кон работата.
Новата структура на Why Agency е поделена во пет области – стратегија, креатива, содржина и продукција, раст и искуства. Тие опфаќаат различни сегменти, од стратешко планирање и креирање кампањи, преку дигитален маркетинг и продукција, до настани и директни искуства со брендовите.
Идејата е овие области да не функционираат изолирано, туку да се комбинираат во зависност од потребите на секој проект.
На настанот беше претставен и Why Wear, брендот за облека и производи на агенцијата. Иницијативата има и хуманитарен карактер, бидејќи средствата од продажбата се наменети за набавка на училишен прибор и опрема за првачиња од семејства на кои им е потребна поддршка.
По официјалното претставување на новиот идентитет, прославата продолжи со музика, храна и дружење на гостите.
Со одбележувањето на јубилејот, Why Agency ја затвори првата деценија од своето работење, но воедно го претстави и правецот во кој сака да продолжи – со нов визуелен идентитет и структура, но со истото прашање во центарот: „Why?“