„300 стебла цреши, сите се оштетени“ – Овоштар од Тетово бара помош од општината

Падот на температурите до -6 степени минатата недела предизвика значителна штета на многу дрвца, речиси 100%. Најпогодени се црешите и вишните кои до падот на температурите веќе процветаа.

Денеска го посетивме Ибрахим Фејзулаху кој има над 300 стебла цреши, кои се сериозно оштетени. Тој вели дека штетите се големи, бидејќи од 300-те стебла што ги засадил, секоја година родот бил од 12 до 15 тони.

„Ги уништи сите. Тие се 90 или 99% оштетени и можете да видите какви се. Овде во изминатите години берев 13, 12 тони до 15 тони. Минатата година градот целосно ги уништи. Годинава мразот повторно уништи се и немаме капацитет да одиме понатаму. Може да се каже 100%. Овде можете сами да видите колку се оштетени“, вели Ибрахим Фејзулаху.

Ибрахим ги повикува надлежните од Општина Тетово да излезат на терен и да ја проценат штетата, иако, како што вели, не бара стопроцентна отштета за загубите, туку малку помош би им била многу вредна. Според него, во сите други општини институциите ги земале предвид штетите.

„Бев во општината и пријавив. Воопшто не земаа предвид. Не знаеме што да правиме. Не бараме којзнае што. Малку да ја ублажат ситуацијата за да преживееме. Знаеме дека не можеме сето тоа да го платат, но за да преживееме мора малку да ја ублажиме ситуацијата. Тоа е она што го бараме, помош. Имаме 300 стебла. И сега оставаме на општината да излезат инспекторите на терен да видат“, велат Ибрахим Хејзулаху.

Поради празникот Велигден, од општина Тетово не успеавме да добиеме одговор, кој го очекуваме во текот на утрешниот ден. Во меѓувреме, ниските температури предизвикаа штета и на јаболката.

Во Преспанскиот регион е прогласена вонредна состојба и општината формираше комисија за проценка на штети. Во такви случаи, надоместокот со одлука на Владата покрива најмалку 10 до максимум 30 % од висината на проценетата штета.