Кејти Захарија ја напушти функцијата портпаролка на Белата куќа само една недела по нејзиното именување. Заминувањето доаѓа откако таа се соочи со критики поради тврдењата дека е адвокатка, како и поради негативните оценки за нејзината прва прес-конференција.
Американскиот претседател Доналд Трамп во петокот изјави дека ѝ предложил повторно да размисли за прифаќањето на функцијата. Набргу потоа, висок претставник на Белата куќа потврдил за NBC News дека таа повеќе не е на функцијата.
Американскиот претседател рече дека некои медиуми се однесувале „многу лошо“ кон Захарија и дека сака таа да биде „среќна“. Тој изјави дека таа му кажала оти работата е „многу потешка“, но дека ќе ѝ остави самата да одлучи дали ќе поднесе оставка. „Таа е добра личност, прекрасна личност, и се однесуваа грубо кон неа“, им рече претседателот на новинарите.
Трамп додаде дека ја прашал дали навистина сака „да живее вака“, бидејќи медиумите веројатно нема да „попуштат“. Само неколку дена претходно, претседателот изјави дека верува оти новата портпаролка ќе биде „фантастична“, но во петокот призна дека „можеби оваа работа не е за неа“.
Захарија, која дипломирала право на Универзитетот Пепердајн во Калифорнија, се најде во центарот на вниманието откако во интервјуа повеќепати се претставувала како адвокатка. Таа призна дека не го положила правосудниот испит во сојузната држава Калифорнија и дека никогаш не се обидела повторно да го полага, бидејќи во меѓувреме се преселувала во Кина.
Четириесет и двегодишната Захарија изјави дека внимавала да не се нарекува „адвокат со право на застапување“, што би укажувало дека е квалификувана за практикување на адвокатската професија. Во интервју за Fox News, Захарија рече дека се консултирала со „правни експерти“, кои ѝ кажале дека е прифатливо да се нарекува адвокатка бидејќи посетувала „реномирано правно училиште“ и имала „правно искуство“.