Анализа на училишни објекти во случај на земјотрес – основното училиште Лирија има потреба од интервенција

Општина Тетово даде наредба за анализирање на сите училишни објекти. Училиштето Лирија, врз основа  на општинска комисија е меѓу најзагрозените објекти во случај на земјотрес. После тоа и Институтот за сеизмологија направил анализа на стабилноста на училишната зграда, но резултатите од истата се уште не стигнале. Според раководителот на Секторот за образование во општина Тетово, Назми Даути, општината ќе гради нов објект на оваа локација бидејќи овој објект е еден од најстарите објекти во регионот на Тетово.

„Направена е анализа на објектите во рамките на училиштата во Тетово, поточно во училиштето Лирија, според првичните информации, бидејќи извештајот за сеизмологија и земјотреси се уште не е пристигнат, констатирано е дека на сегашниот објект  треба да се интервенира да се зајакне или да се изгради сосема нов објект. По оваа информација, општина Тетово планира изградба на нов објект, бидејќи знаеме дека училишниот објект Лирија лоциран во центарот на Тетово е еден од најстарите објекти во рамки на училиштата на нашата општина“, вели Назми Даути.

Но, од секторот за урбанизам велат дека објектот е безбеден и интервенирано е онаму каде што е потребно.

„Функционирањето на објектот е дозволено, но предлозите на комисијата се што поскоро да се направи реконструкција на објектите, а направивме и реконструкции на објектот, а интервениравме и на некои делови од објектот кои што тие моментално се ризични“, вели Рилинд Селмани.

По земјотресот во Турција, општина Тетово формираше комисија за разгледување на состојбата со јавните објекти во општината.